7–11 сентябрь кунлари ўтказилган ўқув машғулотларида Сурхондарё вилоятининг Ўзбекистон Республикаси Ҳуқуқни муҳофаза қилиш академиясига бириктирилган ҳамда 2026 йилнинг саккиз ойи якунлари бўйича “қизил” тоифага киритилган маҳаллаларидан 260 нафар “маҳалла еттилиги” вакили иштирок этди. Машғулотлар давомида улар жиноятчиликнинг барвақт профилактикасига оид билим ва амалий кўникмаларини оширди.
Малака ошириш курслари Ўзбекистон Республикаси Президентининг 2026 йил 5 январдаги “Республика маҳаллаларида хавфсиз муҳитни яратиш йўналишида яхлит манзилли ишлаш тизимини жорий этишга қаратилган қўшма чора-тадбирлар тўғрисида”ги ПҚ–1-сон ҳамда “2026 йилда республика маҳаллаларида жиноятчиликнинг барвақт профилактикаси самарадорлигини янада ошириш бўйича ташкилий чора-тадбирлар тўғрисида”ги ПҚ–2-сон қарорлари асосида ташкил этилди.
Ўқув дастури доирасида илмий тавсияларни амалда қўллаш, конфликтология ва низоларни ҳал этиш тактикаси, стрессни бошқариш, ностандарт вазиятларда руҳий барқарорликни таъминлаш, кибергигиена қоидаларига риоя этиш, кибертаҳдидлардан ҳимояланиш, кибербуллинг ва оилавий зўравонлик, шунингдек, коррупцияга қарши курашишда превентив механизмлар ҳамда ҳалоллик маданияти масалалари илмий-амалий ёндашув асосида ёритилди.
Иштирокчиларга Академия томонидан ишлаб чиқилган “Сурхондарё вилояти маҳаллаларида амалга оширилган ўрганишлар ва ишлаб чиқилган илмий тавсиялар” номли қўлланмадан фойдаланиш тартиби ҳам тушунтирилди.