Ўзбекистон Республикаси Ҳуқуқни муҳофаза қилиш академиясида Бирлашган Миллатлар Ташкилотининг Наркотиклар ва жиноятчилик бўйича бошқармаси (UNODC) ҳамда Германия Федератив Республикаси Ҳукумати кўмагида ихтисослаштирилган семинар-тренинг ўтказилди. Тадбир Интернет тармоғида терроризм ва зўравонлик экстремизмига қарши курашишда OSINTнинг илғор усулларидан фойдаланишга бағишланди.
Семинар-тренингда геофазовий разведка (GEOINT), сунъий йўлдош тасвирларини таҳлил қилиш, хронолокация, ижтимоий тармоқларда ахборотни излаш ва таҳлил қилиш (SOCMINT), шунингдек, инсон ҳуқуқлари соҳасидаги халқаро стандартлар ва қонун устуворлиги тамойилларига мувофиқ электрон далилларни архивлаш ҳамда тақдим этиш бўйича илғор хорижий тажриба ва замонавий усуллар кўриб чиқилди.
Буюк Британия ва Германиядан ташриф буюрган халқаро эксперт-тренерлар раҳбарлигида ўтказилган машғулотларда назарий ва ҳуқуқий жиҳатлар анонимлаштирилган реал кейсларни амалий таҳлил қилиш ҳамда ихтисослаштирилган амалий топшириқларни бажариш билан уйғунлаштирилди.
Семинар-тренинг ҳуқуқни муҳофаза қилувчи органлар вакилларининг касбий кўникмаларини мустаҳкамлашга, шунингдек, терроризм ва зўравонлик экстремизмига қарши курашишда очиқ манбалардан маълумот тўплаш ва таҳлил қилиш (OSINT) соҳасида илғор хорижий тажриба алмашишга хизмат қилди.
Тадбир якунида иштирокчиларга Ўзбекистон Республикаси Ҳуқуқни муҳофаза қилиш академиясининг сертификатлари топширилди.