Ўзбекистон Республикаси Ҳуқуқни муҳофаза қилиш академияси Ўзбекистон Республикаси Ички ишлар вазирлиги ҳузуридаги Тергов департаменти билан ҳамкорликда тергов амалиётида жиноий активларни аниқлаш ва қайтариш механизмларини такомиллаштиришга қаратилган семинар ўтказди.

Семинарни Академия бошлиғи ўринбосари У.У. Нигмаджанов ҳамда Академия ходимлари А.А. Акбутаев ва Ш.Г. Хомидов олиб борди. Тадбирда Тергов департаменти ходимлари, шунингдек, онлайн шаклда ҳудудлардаги тергов бошқармалари, бўлимлари, бўлинмалари ва гуруҳларининг ходимлари иштирок этди. Иштирокчилар сони 1000 нафардан ошди.

Машғулотларда жиноят натижасида олинган пул маблағлари ва бошқа мол-мулкни дастлабки босқичда аниқлаш, уларнинг ҳаракатини кузатиб бориш, хатлаш ва мусодара қилиш, шунингдек, хорижий юрисдикцияларда жойлашган активларни қайтариш бўйича халқаро ҳамкорликни кучайтириш масалалари кўриб чиқилди. Параллел молиявий терговларни ўтказишга алоҳида эътибор қаратилди.

ФАТФ стандартлари ва бошқа халқаро ҳужжатлар талабларидан келиб чиқиб, чет элдаги жиноий активларни тезкор аниқлаш мақсадида Ғарбий ва Марказий Осиёда активларни қайтариш бўйича идоралараро тармоқ (ARIN-WCA), активларни қайтариш бўйича бошқа тармоқлар, Интерпол, молиявий разведка бўлинмалари ҳамда хорижий ваколатли органлар билан расмий ва норасмий ҳамкорлик қилиш имкониятлари батафсил муҳокама қилинди.

Хусусан, хорижий банк ҳисобварақлари, компаниялар, кўчмас мулк ва бошқа активлар ҳақидаги дастлабки маълумотларни тезкор алмашишни, зарурат бўлганда ахборотни ташаббус тартибида юборишни ҳамда кейинчалик олинган маълумотларни ўзаро ҳуқуқий ёрдам тўғрисидаги расмий сўровлар билан мустаҳкамлашни назарда тутувчи алгоритм кўриб чиқилди.

Иштирокчилар халқаро ҳамкорликни амалий натижага йўналтирилган тарзда ташкил этиш, ҳар бир хорижий сўров ҳамда ташаббус тартибида юборилган ахборот бўйича эришилган натижаларни қайд этиб бориш, идоралараро мувофиқлашувни кучайтириш, шунингдек, жиноий активларнинг сақланишини таъминлаш ва уларни қайтаришга қаратилган тезкор чораларни такомиллаштириш масалаларини муҳокама қилди.

Тадбир терговчиларнинг молиявий терговлар ва активларни қайтариш соҳасидаги касбий кўникмаларини мустаҳкамлаш, халқаро ҳамкорлик механизмларидан самарали фойдаланиш ҳамда жиноятдан олинган активларни давлат ва жабрланган шахслар манфаатларини кўзлаб қайтариш бўйича миллий амалиётни янада ривожлантиришга хизмат қилди.