Тошкент шаҳри Чилонзор туманидаги 178- ва 182-сонли умумтаълим мактабларида вояга етмаганлар ўртасида ҳуқуқбузарлик ва жиноятчиликнинг олдини олиш, ўқувчиларнинг ҳуқуқий онги ҳамда ҳуқуқий маданиятини юксалтиришга қаратилган ҳуқуқий тарғибот тадбири бўлиб ўтди. Тадбирда Ўзбекистон Республикаси Ҳуқуқни муҳофаза қилиш академияси ходимлари иштирок этди.

Ўқувчиларга «Вояга етмаганлар ўртасида назоратсизлик ва ҳуқуқбузарликларнинг профилактикаси» мавзусида тушунтиришлар берилди. Бунда вояга етмаганларнинг ҳуқуқ ва мажбуриятлари, ҳуқуқбузарлик ва жиноятларнинг салбий оқибатлари, назоратсизликнинг олдини олиш чоралари, ҳуқуқий маданиятни шакллантириш ҳамда ёшларнинг бўш вақтини мазмунли ташкил этиш масалаларига алоҳида эътибор қаратилди.

Шунингдек, ўқувчиларга ҳуқуқбузарлик содир этилишига олиб келиши мумкин бўлган омиллардан огоҳ бўлиш, тенгдошларининг салбий таъсирига берилмаслик, интернет ва ижтимоий тармоқлардан оқилона фойдаланиш ҳамда ўз ҳуқуқ ва манфаатларини қонунда белгиланган тартибда ҳимоя қилиш бўйича тавсиялар берилди.

Очиқ мулоқот давомида ўқувчилар ўзларини қизиқтирган ҳуқуқий масалалар бўйича мутахассисларга бевосита мурожаат қилиб, тегишли тушунтиришлар олиш имкониятига эга бўлди.