Ўзбекистон Республикаси Бош прокурорининг биринчи ўринбосари Б. Валиев раҳбарлигида Президентнинг 2026 йил 5 январдаги ПҚ-1 ва ПҚ-2-сон қарорлари ижросини таъминлаш мақсадида 14–18 сентябрь кунлари Қашқадарё вилоятида Республика идоралараро мувофиқлаштириш штаби ва ишчи гуруҳи томонидан ўрганишлар ўтказилмоқда.

Мазкур тадбирлар доирасида Ҳуқуқни муҳофаза қилиш академияси профессор-ўқитувчилари томонидан жорий йилнинг 8 ойи якунлари бўйича “қизил” тоифага киритилган маҳаллаларда фаолият юритаётган 400 нафардан ортиқ “маҳалла еттилиги” ходимлари учун қисқа муддатли масофавий малака ошириш курслари ташкил этилди.

Ўқув машғулотларида конфликтология, низоларни ҳал этиш тактикаси, стресс-менежмент, психологик барқарорлик, кибергигиена ва кибертаҳдидлардан ҳимояланиш, оилавий зўравонликнинг олдини олиш, коррупцияга қарши курашишнинг превентив механизмлари ҳамда ҳалоллик маданиятини шакллантириш масалалари қамраб олинди.

Шунингдек, 2023–2025 йилларда Академияга бириктирилган “қизил” тоифадаги маҳаллаларда амалга оширилган илмий-амалий ўрганишлар натижалари ҳамда улар асосида ишлаб чиқилган ташкилий-криминологик тактика ва стратегиялар муҳокама қилинди.

Ўрганишлар натижасида тайёрланган “Ўзбекистон Республикаси Президентининг 2026 йил 5 январдаги ПҚ-1 ва ПҚ-2-сон қарорлари билан Ҳуқуқни муҳофаза қилиш академиясига бириктирилган Қашқадарё вилояти маҳаллаларида амалга оширилган ўрганишлар ва ишлаб чиқилган илмий тавсиялар” номли қўлланмани амалиётда қўллаш масалаларига алоҳида эътибор қаратилди.