2026 йил 18 сентябрь куни Ўзбекистон Республикаси Ҳуқуқни муҳофаза қилиш академиясида «Криминология» (Умумий қисм) дарслигининг расмий тақдимоти бўлиб ўтди.

Дарслик Академиянинг «Жиноят ҳуқуқи ва криминология» кафедраси профессор-ўқитувчилари ҳаммуаллифлигида тайёрланган бўлиб, Ўзбекистон Республикаси Олий таълим, фан ва инновациялар вазирлиги томонидан юриспруденция ва тергов фаолияти таълим йўналишлари талабалари учун дарслик сифатида тавсия этилган. Мазкур нашр «Адолат» миллий ҳуқуқий ахборот маркази томонидан чоп этилди.

Тақдимотда соҳа мутахассислари, профессор-ўқитувчилар ҳамда талабалар иштирок этди. Тадбир давомида нашрнинг мазмун-моҳияти, илмий ва ўқув-услубий аҳамияти юзасидан фикр-мулоҳазалар билдирилди.

Қайд этилганидек, дарслик криминологик аҳамиятга эга манбалар ва статистик маълумотларни тизимли таҳлил қилиш асосида тайёрланган. Унда криминология фани Умумий қисмининг асосий институтлари қамраб олиниб, мавзулар мантиқий изчилликда, равон ва тушунарли тарзда баён этилган.

Янги дарслик бўлажак ҳуқуқшуносларнинг криминологик билимларини мустаҳкамлаш, жиноятчиликнинг сабаб ва шарт-шароитларини илмий асосда таҳлил қилиш кўникмаларини шакллантириш ҳамда юридик таълим жараёнини замонавий ўқув адабиётлари билан таъминлашга хизмат қилади.