2026 йил 22 сентябрь куни Ўзбекистон Республикаси Ҳуқуқни муҳофаза қилиш академиясида биринчи босқич талабалари учун «Муваффақият сирлари» мавзусида учрашув ташкил этилди.
Тадбирда Ўзбекистон Республикаси Бош прокурори ўринбосари Светлана Боймирзаевна Артикова ҳамда Бош прокуратура бошқарма бошлиғи Барно Акбутаевна Умарова иштирок этди.
Учрашув давомида прокуратура органларида хизмат қилишнинг шарафли ва масъулиятли жиҳатлари, аёл прокурорнинг касбий қиёфаси ҳамда профессионал фаолиятда зарур бўлган фазилатлар хусусида сўз юритилди.
Ватан ва касбга садоқат, қонун устуворлигини таъминлаш, инсон қадр-қимматини ҳимоя қилиш, ҳалоллик, камтарлик ва меҳнатсеварлик муваффақиятнинг муҳим омиллари экани алоҳида таъкидланди.
Очиқ мулоқот якунида талабалар ўзларини қизиқтирган саволларга атрофлича жавоб олдилар. Мазкур учрашув уларнинг касбий дунёқарашини бойитиш ва келгусидаги мақсадларини белгилаб олишида муҳим аҳамият касб этди.