Рақамли далиллар билан ишлаш, интернет фирибгарлиги ва криптоактивлар билан боғлиқ жиноятларни тергов қилиш Иқтисодий жиноятларга қарши курашиш департаменти терговчилари учун ташкил этилган малака ошириш дастурининг асосий мавзулари бўлди.

«Кибержиноятчиликка қарши курашишнинг замонавий ёндашувлари ва халқаро ҳамкорлик механизмлари» мавзусидаги курсни Ўзбекистон Республикаси Ҳуқуқни муҳофаза қилиш академиясининг Рақамли криминалистика илмий-тадқиқот институти ташкил этди. У ахборот технологияларидан фойдаланган ҳолда содир этиладиган жиноятларни аниқлаш ва тергов қилиш бўйича терговчилар тайёргарлигини такомиллаштиришга қаратилди.

Машғулотларда электрон далилларни аниқлаш, олиш, сақлаш ва таҳлил қилиш усуллари, рақамли изларни ўрганиш, криптоактивлар билан боғлиқ жиноятларни тергов қилиш хусусиятлари ҳамда интернет фирибгарлигини фош этиш йўллари кўриб чиқилди. Рақамли тергов жараёнида халқаро ҳамкорликнинг ҳуқуқий механизмларига ҳам алоҳида эътибор қаратилди.

Курс якунида иштирокчиларга сертификатлар топширилди.