Ўзбекистон Республикаси Ҳуқуқни муҳофаза қилиш академиясида ходимлар ўртасида «Заковат» интеллектуал ўйини ўтказилди. Ўйин ходимларнинг мантиқий фикрлаш қобилиятини ривожлантириш, жамоавий ҳамкорлик кўникмаларини мустаҳкамлаш ҳамда тарихий, маънавий-маърифий ва умумий билимларини кенгайтиришга қаратилди. 

Саволлар «Биринчи ва иккинчи Ренессанс – буюк даҳолар даври», «Тарихий хотира беқиёс» ҳамда «Китоб – маънавият кўзгуси» мавзулари асосида тайёрланди.

Беллашувда жамоалар Биринчи ва Иккинчи Ренессанс даврлари алломаларининг илм-фан ва цивилизация тараққиётига қўшган ҳиссаси, тарихий хотирани асраб-авайлаш, қатағон йилларида жабр кўрган прокуратура ходимларининг фаолияти, китобхонлик маданияти ва маънавий меросга оид саволларга жавоб берди.

Иштирокчилар саволларни биргаликда муҳокама қилиб, мантиқий таҳлил асосида жавобларини тақдим этди. Ўйин ходимларга билимларини синовдан ўтказиш ва жамоа бўлиб ишлаш кўникмаларини намоён этиш имконини берди.