Ўзбекистон Республикаси Ҳуқуқни муҳофаза қилиш академиясида Ўқитувчи ва мураббийлар кунига бағишланган байрам тадбири бўлиб ўтди. Унда Бош прокуратура вакиллари, фахрийлар, Академия ҳамкорлари, ходимлари ва талабалари иштирок этдилар.

Академияда устозлар бўлажак ҳуқуқшуносларнинг касбий шаклланишига муносиб ҳисса қўшиб, уларга билим ва тажриба билан бирга қонунга ҳурмат, масъулият ва касбий ҳалолликни ҳам сингдириб келмоқда.

Тадбирда профессор-ўқитувчилар ва фахрийлар эъзозланди. Талабалар томонидан тайёрланган байрам дастури устозларга миннатдорлик ифодаси бўлиб, учрашувга самимийлик ва кўтаринки руҳ бағишлади. Турли авлод вакилларининг бир даврада жам бўлиши устоз-шогирд анъаналарининг Академия ҳаётидаги ўрнини яна бир бор намоён этди.

Байрам доирасида Ўзбекистон Республикаси Бош прокурори ҳамда Академия бошлиғининг буйруқларига мувофиқ бир гуруҳ ходимлар рағбатлантирилди.

Академия жамоаси барча устоз ва мураббийларни касб байрами билан самимий табриклаб, уларга мустаҳкам соғлиқ, оилавий фаровонлик ва ёш авлодни тарбиялашдек шарафли ишда муваффақиятлар тилайди.