Ўзбекистон Республикаси Ҳуқуқни муҳофаза қилиш академиясида талабаларнинг ёнғин хавфсизлиги бўйича билим ва амалий кўникмаларини мустаҳкамлашга қаратилган машғулот ўтказилди. Унда ёнғиннинг олдини олиш, хавф юзага келганда тўғри ҳаракат қилиш ва бирламчи ёнғин ўчириш воситаларидан фойдаланишга эътибор қаратилди.
Мутахассислар ёнғинга сабаб бўлувчи омиллар, электр жиҳозларидан хавфсиз фойдаланиш талаблари ҳамда ёнғин хавфсизлиги қоидаларини тушунтирдилар. Шунингдек, ёнғин содир бўлганда ҳаракат қилиш тартиби ва хавфсиз эвакуация қоидалари ҳақида маълумот берилди.
Машғулотнинг амалий қисмида бирламчи ёнғин ўчириш воситаларидан фойдаланиш тартиби намойиш этилди. Талабалар амалий жараёнда бевосита иштирок этиб, мутахассислар кўрсатмалари асосида ўрганган усулларини синаб кўрдилар.
Машғулот давомида талабаларнинг саволларига жавоблар берилиб, ёнғин хавфи юзага келганда саросимага тушмасдан, белгиланган тартибда ҳаракат қилиш ва эвакуация пайтида хавфсизлик қоидаларига риоя этиш бўйича тавсиялар берилди.
