2026 йил 24 ноябрь куни Ўзбекистон Республикаси Ҳуқуқни муҳофаза қилиш академиясида «БМТнинг Коррупцияга қарши конвенциясини амалга ошириш механизми» мавзусида Конвенция иштирокчи давлатлари конференциясининг модели бўлиб ўтади. Ушбу тадбир Ўзбекистон Республикаси прокуратура органларининг 35 йиллигига бағишланган Халқаро ҳуқуқни муҳофаза қилиш форуми доирасидаги тадбирлар туркумига киритилган.
Конференция модели Конвенциянинг коррупциянинг олдини олиш сиёсати ва амалиётига оид 5-моддасини амалга ошириш масалаларига бағишланади. Унда Қозоғистон, Қирғиз Республикаси, Тожикистон ва Ўзбекистон олий таълим муассасаларининг тўққизта жамоаси иштирок этиши кутилмоқда.
Тадбир Ҳуқуқни муҳофаза қилиш академияси ва Коррупцияга қарши курашиш агентлиги томонидан БМТнинг Гиёҳвандлик ва жиноятчилик бўйича бошқармаси, Европа Иттифоқи ҳамда Германия халқаро ҳамкорлик жамияти (GIZ) билан ҳамкорликда ташкил этилмоқда.
Биринчи босқичда жамоалар иштирокчи давлатлар делегациялари сифатида халқаро стандартлар миллий қонунчилик ва амалиётда қандай татбиқ этилаётганини кўрсатиб берадилар. Тақдимотларда коррупциянинг олдини олишга доир институционал механизмлар ва уларнинг амалий натижалари ҳам ёритилади. Иккинчи босқичда жамоалар турли мамлакатлар тажрибасини қиёсий таҳлил қилиш асосида миллий қонунчилик ва ҳуқуқни қўллаш амалиётини такомиллаштириш бўйича таклифларини тақдим этадилар.