Ўзбекистон Республикаси Ҳуқуқни муҳофаза қилиш академиясида давлат органлари ва ташкилотларининг коррупцияга қарши курашиш режаларини аниқланган хавф-хатарлар асосида ишлаб чиқишга қаратилган икки кунлик тренинг ўтказилмоқда. Машғулотлар комплаенс-назорат ва коррупцияга қарши курашишга масъул тузилмалар ходимларининг хавф-хатарларни аниқлаш, баҳолаш ҳамда уларнинг олдини олиш чораларини белгилаш бўйича амалий кўникмаларини такомиллаштиришга йўналтирилган.

8–9 октябрь кунлари ўтказилаётган тренинг Европа Иттифоқининг Ўзбекистонда бошқарувни такомиллаштириш ва коррупциянинг олдини олишга қаратилган лойиҳаси доирасида «Минтақавий мулоқот» халқаро нодавлат нотижорат ташкилоти ҳамда Германия халқаро ҳамкорлик жамияти (GIZ) кўмагида ташкил этилган. Машғулотларни коррупцияга қарши курашиш ва хавф-хатарларни баҳолаш бўйича халқаро эксперт Квентин Рид (Буюк Британия) олиб бормоқда.

Дастур доирасида иштирокчилар амалий машқлар орқали коррупциявий хавф-хатарларни аниқлаш ва баҳолаш, уларни келтириб чиқарувчи сабаблар ҳамда уларга имкон берувчи шарт-шароитларни таҳлил қилиш усулларини ўрганмоқдалар. Баҳолаш натижаларини давлат органлари ва ташкилотлари фаолиятининг хусусиятларига мос профилактик чораларга айлантириш масалалари муҳокама қилинмоқда.

Машғулотларга усоубий манба сифатида «Ҳалолликни режалаштириш: Ўзбекистон давлат муассасалари учун қўлланма» (Integrity Planning) ҳам киритилган. Ундаги ёндашувларни хавф-хатарларни баҳолаш ва коррупцияга қарши чора-тадбирларни режалаштиришда қўллаш имкониятлари кўриб чиқилмоқда.

Тренингда Олий Мажлис Сенатининг Суд-ҳуқуқ масалалари ва коррупцияга қарши курашиш қўмитаси, Қонунчилик палатасининг Коррупцияга қарши курашиш ва суд-ҳуқуқ масалалари қўмитаси, Бош прокуратура, Коррупцияга қарши курашиш агентлиги ҳамда Кадастр агентлиги вакиллари иштирок этмоқда. Шунингдек, ички ишлар, қурилиш ва уй-жой коммунал хўжалиги, соғлиқни сақлаш, камбағалликни қисқартириш ва бандлик, таълим, қишлоқ хўжалиги, сув хўжалиги, иқтисодиёт ва молия, энергетика, маданият ҳамда рақамли технологиялар соҳаларидаги вазирликларнинг масъул ходимлари қатнашмоқда.

Коррупцияга қарши курашиш кластери доирасида Академия, Тошкент давлат юридик университети, Криминология тадқиқот институти ҳамда Юридик кадрларни қайта тайёрлаш ва малакасини ошириш институти вакиллари ҳам машғулотларда иштирок этмоқда.

Тренингда алоҳида эътибор коррупцияга қарши чора-тадбирлар режаларини хавф-хатарларни баҳолаш натижалари билан боғлашга қаратилган. Иштирокчилар аниқланган хавфнинг сабабларига таъсир қиладиган ҳамда тегишли орган ёки ташкилот фаолиятида қўллаш мумкин бўлган чораларни ишлаб чиқиш ёндашувларини муҳокама қилмоқдалар.