Ўзбекистон Республикаси Ҳуқуқни муҳофаза қилиш академияси Тил ўргатиш кафедраси ходими Х.Юлдашев CELTA (Certificate in Teaching English to Speakers of Other Languages) дастурини муваффақиятли якунлаб, инглиз тилини ўқитиш бўйича халқаро миқёсда тан олинган малака сертификатини қўлга киритди.

Cambridge English томонидан тақдим этиладиган CELTA сертификати ўқитувчининг инглиз тилини хорижий тил сифатида ўқитиш бўйича методик билимлари ва амалий педагогик кўникмаларини тасдиқлайди. Дастур назарий тайёргарлик ва педагогик амалиётни қамраб олади. Амалиёт давомида мутахассислар дарсларни кузатиб, ўқитувчининг фаолиятини баҳолайдилар.

Тайёргарлик жараёнида дарсларни таълим олувчиларнинг эҳтиёжлари ва тайёргарлик даражасига мос равишда режалаштириш, тил кўникмаларини ривожлантириш, коммуникатив ёндашувларни қўллаш ҳамда ўтилган машғулотларни таҳлил қилишга алоҳида эътибор қаратилди.

Ўзлаштирилган ёндашувларни Академияда инглиз тили машғулотларида қўллаш орқали таълим олувчиларнинг оғзаки ва ёзма нутқини амалий ривожлантириш имкониятларини кенгайтириш кўзда тутилган. Орттирилган тажриба кафедра фаолияти доирасида замонавий ўқитиш методларини оммалаштириш учун ҳам асос бўлиб хизмат қилади.