Академияда прокуратура органларига илк бор хизматга қабул қилинган ходимлар учун бирламчи ихтисослашув шаклидаги касбий қайта тайёрлаш курси ўқув машғулотлари ўтказиб келинмоқда. Курс зарур касбий билим, кўникма ва компетенцияларни шакллантириш, тингловчиларни прокурорлик фаолиятининг ўзига хос хусусиятлари билан таништириш ҳамда назарий тайёргарликни амалиёт билан уйғунлаштиришга қаратилган.

Курсда 74 нафар ходим иштирок этмоқда. 576 соатлик дастурнинг 160 соати Академияда ишдан ажралган ҳолда ўтказилди.

Дастур прокуратура органлари фаолиятининг ҳуқуқий асослари, прокурорлик назорати, жиноятчиликка қарши курашиш ва ҳуқуқбузарликлар профилактикаси, жиноят-процессуал фаолият, фуқароларнинг ҳуқуқ ва эркинликларини ҳимоя қилиш, шунингдек, судларда прокурор ваколатларини амалга ошириш масалаларини қамраб олади.

Амалий тайёргарлик хизмат вазиятларини таҳлил қилиш, кейсларни кўриб чиқиш, гуруҳли муҳокамалар ва топшириқларни бажаришни ўз ичига олади. Тингловчилар процессуал ва бошқа хизмат ҳужжатларини тайёрлаш бўйича ҳам амалий кўникмаларини мустаҳкамлайдилар.

Тингловчиларни тайёрлашга Академия ўқитувчилари, прокуратура органларининг тажрибали ходимлари ва тегишли соҳа мутахассислари жалб этилган. Курс давомида қонунийликка риоя қилиш, инсон ҳуқуқ ва эркинликларини ҳимоя қилиш, ҳуқуқбузарликларнинг олдини олиш ва касбий этика талабларига амал қилишга алоҳида эътибор қаратилмоқда. Дастурнинг амалий йўналтирилгани тингловчиларга билимларини мустаҳкамлаш ва прокуратура органларидаги хизмат вазифаларини бажаришга тайёргарлик кўриш имконини беради.