Ўзбекистон Республикаси Ҳуқуқни муҳофаза қилиш академияси ҳузуридаги DSc.24/2025.27.12.Yu.01.01 рақамли Илмий кенгаш мажлисида Академия мустақил изланувчиси Ўринбоева Мухлиса Маъруфовнанинг 12.00.04 – «Фуқаролик процессуал ҳуқуқи. Иқтисодий процессуал ҳуқуқи. Ҳакамлик жараёни ва медиация» ихтисослиги бўйича юридик фанлар бўйича фалсафа доктори (PhD) илмий даражасини олиш учун тақдим этган «Фуқаролик суд ишларини юритишда сунъий интеллектдан фойдаланишнинг истиқболлари: қиёсий-ҳуқуқий таҳлил» мавзусидаги диссертация иши ҳимоя қилинди.

Тадқиқотда фуқаролик суд ишларида сунъий интеллектдан фойдаланиш билан боғлиқ ҳуқуқий масалалар ва хорижий мамлакатлар тажрибаси таҳлил қилинди. Муаллиф «Рақамли суд» концепцияси доирасида судга мурожаат қилиш ва айрим процессуал ҳаракатларни масофадан амалга ошириш, иш материаллари билан электрон танишиш, суд харажатларини ҳисоблаш ҳамда суд мажлиси баённомаларини реал вақтда тайёрлаш каби имкониятларни назарда тутишни таклиф этди.

Шунингдек, сунъий интеллектдан фойдаланишда қонунийлик, шаффофлик, масъулият, камситишга йўл қўймаслик ва маълумотларни ҳимоя қилиш тамойилларини мустаҳкамлаш зарурати асослантирилди. Тадқиқот доирасида сунъий интеллектга асосланган ечимларни яратиш ва қўллаш бўйича этика қоидалари лойиҳаси ҳам ишлаб чиқилди.