Ўзбекистон Республикаси Ҳуқуқни муҳофаза қилиш академияси вакили Корея Республикасида Корея халқаро ҳамкорлик агентлиги (KOICA) ҳамда Корея криминология ва адлия институти (KICJ) ҳамкорлигида ўтказилаётган «Ўзбекистонда гиёҳванд моддаларни назорат қилиш бўйича давлат хизматчиларининг салоҳиятини ошириш» мавзусидаги халқаро малака ошириш курсида қатнашмоқда. 2026 йил 11–24 октябрь кунларига мўлжалланган дастурда Ўзбекистоннинг давлат идоралари ва илмий-амалий муассасаларидан 15 нафар мутахассис иштирок этмоқда.
Курсда Корея Республикасининг гиёҳванд моддалар назорати бўйича сиёсати ва ҳуқуқий механизмлари, ҳуқуқбузарликларни аниқлаш ҳамда тергов қилиш амалиёти, замонавий назорат усуллари ва идоралараро ҳамкорлик масалалари ўрганилмоқда. Шунингдек, гиёҳвандликнинг олдини олиш, қарамликни даволаш ва реабилитацияни уйғунлаштирган комплекс ёндашувга эътибор қаратилмоқда.
Корея тажрибасини миллий амалиёт билан қиёсий ўрганиш ҳуқуқни муҳофаза қилувчи органлар ходимларини тайёрлаш ва малакасини ошириш жараёнида гиёҳванд моддаларнинг ноқонуний айланмасига қарши курашиш, ҳуқуқбузарликларни аниқлаш ва тергов қилиш ҳамда идоралараро ҳамкорлик бўйича замонавий ёндашувларни қўллашга замин яратади.
