Ўзбекистон Республикаси Ҳуқуқни муҳофаза қилиш академияси ишчи гуруҳи Жиззах шаҳрининг «Жиззахлик», «Маданият» ва «Улуғбек» маҳаллаларида криминоген вазиятни ўрганди. 

«Жиззахлик» маҳалласида ҳуқуқбузарлик ва жиноятларнинг сабаблари ҳамда шарт-шароитлари таҳлил қилиниб, аниқланган омилларни ҳисобга олган ҳолда манзилли профилактика бўйича илмий таклифлар ишлаб чиқилди.

Ўрганишлар Ўзбекистон Республикаси Президентининг 2025 йил 3 январдаги ПҚ–1-сон «2025 йилда республика маҳаллаларида хавфсиз муҳитни яратиш ва ҳуқуқбузарликларнинг барвақт олдини олиш тизими самарадорлигини янада ошириш бўйича чора-тадбирлар тўғрисида»ги қарорида белгиланган вазифалар ижроси доирасида ўтказилди.

Академияга бириктирилган Жиззах вилояти маҳаллаларида ўрганишлар асосида ишлаб чиқилган тавсиялар амалиётга татбиқ этилмоқда, профилактика чораларининг натижадорлиги эса мунтазам баҳоланмоқда. Академия «маҳалла еттилиги» аъзолари учун ўтказаётган ўқув-семинарлар ҳам ушбу тизимли ишнинг бир қисми бўлиб, уларнинг маҳаллаларда профилактика чораларини ташкил этиш бўйича амалий кўникмаларини мустаҳкамлашга қаратилган.