Ўзбекистон Республикаси Ҳуқуқни муҳофаза қилиш академиясида Жиноят-процессуал ҳуқуқи фанининг суд босқичини ўрганаётган тингловчилар учун Ўзбекистон, Қирғизистон ва Қозоғистон мутахассислари иштирокида бинар машғулотлар ўтказилди. Машғулотлар суд мажлисларини имитация қилиш залида ташкил этилди.

Уларга Қирғизистон Республикаси Бош прокуратураси ходими Медер Маликов, Қирғизистон Республикаси Бош прокуратурасининг Юридик академияси ходими Асель Загибаева, Қозоғистон Республикаси Бош прокуратураси ҳузуридаги Ҳуқуқни муҳофаза қилувчи органлар академияси ходими Рустем Нугманов ҳамда жиноят ишлари бўйича Чилонзор туман суди раисининг ўринбосари Фотима Исмаилова таклиф этилди.

Машғулотларда жиноят ишларини судда кўришнинг ўзига хос жиҳатлари, прокурорнинг суддаги процессуал мақоми ва ваколатлари, давлат айбловини қувватлаш, процесс иштирокчиларининг ҳуқуқларини таъминлаш масалалари кўриб чиқилди. Шунингдек, уч мамлакатдаги суд амалиёти, суд ва ҳуқуқни муҳофаза қилувчи органлар фаолияти ҳамда ушбу соҳалар учун кадрлар тайёрлашнинг замонавий ёндашувлари қиёсий таҳлил қилинди.

Таклиф этилган мутахассислар жиноят-процессуал қонунчиликни амалиётда қўллаш, суд жараёнидаги ҳуқуқий вазиятларни таҳлил қилиш ва процессуал қарорлар қабул қилиш бўйича тажрибалари билан ўртоқлашиб, тушунтиришлар бердилар. Интерактив формат тингловчиларга назарий билимларини амалий кўникмалар билан мустаҳкамлаш, хорижий тажрибани қиёсий ўрганиш ва мутахассисларга бевосита савол бериш имконини яратди.