Ўзбекистон Республикаси Бош прокуратураси ва Ҳуқуқни муҳофаза қилиш академияси делегациясининг терроризмга қарши курашиш масалалари бўйича Буюк Британияга амалий ташрифи бошланди. Ташриф доирасида Ҳуқуқни муҳофаза қилиш академияси вакиллари Салфорд университети мутасаддилари билан учрашди.

Учрашувда томонлар Академия ва университет фаолияти, таълим жараёнини ташкил этиш ҳамда кадрлар тайёрлаш тажрибаси ҳақида маълумот алмашди, келгусидаги ҳамкорлик йўналишларини муҳокама қилди. Салфорд университети Катта Манчестер ҳудудидаги ҳуқуқни муҳофаза қилувчи органлар учун кадрлар тайёрлашга ихтисослашгани инобатга олиниб, унинг ушбу йўналишдаги тажрибасига алоҳида эътибор қаратилди.

Академия вакиллари университет кампуслари ва ўқув-амалий инфратузилмаси билан танишди. Хусусан, тергов ҳаракатларини ўтказиш кўникмаларини шакллантиришга мўлжалланган ўқув полигонлари ҳамда виртуал симуляция дастурлари намойиш этилди. Уларнинг амалий машғулотларда қўлланилиши ва касбий кўникмаларни ривожлантириш имкониятлари ҳақида маълумот берилди.