Ўзбекистон Республикаси Ҳуқуқни муҳофаза қилиш академияси вакиллари Будапештда бўлиб ўтган V Ludovika International Law Enforcement Research Symposium (LILERS) халқаро симпозиумида иштирок этиб, ҳуқуқни муҳофаза қилиш соҳасида кадрлар тайёрлаш бўйича маърузалар қилди.

Маърузаларда клиник таълимнинг назария ва амалиётни уйғунлаштириш ҳамда таълим олувчиларнинг касбий компетенцияларини шакллантиришдаги ўрни, шунингдек, кадрлар тайёрлашда инсон ҳуқуқларига асосланган ёндашувлар кўриб чиқилди. Клиник таълимга оид маърузада Академиянинг бу йўналишдаги тажрибаси ёритилди.

Симпозиум Венгрия Давлат хизмати университети (Ludovika University of Public Service) Ҳуқуқни муҳофаза қилиш факультети томонидан Венгрия Ички ишлар вазирлиги кўмагида ташкил этилди. Унда турли мамлакатлардан ҳуқуқни муҳофаза қилиш соҳасида кадрлар тайёрлайдиган олий таълим муассасалари раҳбарлари, олимлар ва амалиётчилар қатнашди.

Бешта шўъба йиғилишида инновацион таълим ёндашувлари, сунъий интеллектни ўқув жараёнига жорий этиш, тадқиқот натижаларини амалиётга татбиқ қилиш ва халқаро ҳамкорлик масалалари муҳокама қилинди. Симпозиумда иштирок Академиянинг Европа таълим муассасалари билан илмий алоқаларини кенгайтириш, илғор тажрибани ўқув жараёнига жорий этиш ва профессор-ўқитувчилар алмашинувини ривожлантиришга хизмат қилади.