Ўзбекистон Республикаси Ҳуқуқни муҳофаза қилиш академиясида вилоят ва уларга тенглаштирилган прокуратуралар ходимлари, шунингдек, туман (шаҳар) прокуратуралари терговчилари учун аралаш шаклда малака ошириш ўқув курси ташкил этилди.

Курс дастури жиноятларни тергов қилиш ва тўғри квалификациялаш бўйича касбий билим ҳамда амалий кўникмаларни такомиллаштиришга қаратилди. Машғулотларда терговнинг замонавий усуллари, жиноят таркибининг зарурий белгилари, далилларни тўплаш ва баҳолаш, процессуал қарорларни қонуний ва асослантирилган ҳолда қабул қилиш масалалари кўриб чиқилди.

Назарий мавзулар амалий вазиятлар, кейслар ва тергов амалиётидан олинган мисоллар асосида муҳокама қилинди. Тингловчилар жиноятларни тергов қилиш ва квалификациялашда учрайдиган муаммоли масалаларни таҳлил қилиб, уларнинг ечимлари юзасидан фикр алмашдилар. Машғулотларга Академия профессор-ўқитувчилари ва тегишли соҳаларда амалий тажрибага эга мутахассислар жалб этилди.

Аралаш шаклдаги таълим тингловчиларга ишдан ажралмаган ҳолда ўқиш ва Академиядаги амалий машғулотларда касбий кўникмаларини мустаҳкамлаш имконини берди. Курс якунида тингловчиларнинг ўзлаштирган билимлари ва амалий кўникмалари баҳоланиб, дастурни муваффақиятли ўзлаштирганликларини тасдиқловчи ҳужжатлар белгиланган тартибда расмийлаштирилди.