Ўзбекистон Республикаси Ҳуқуқни муҳофаза қилиш академияси Рақамли криминалистика илмий-тадқиқот институти вакили ЕХҲТ Котибияти ташаббуси билан Остона шаҳрида ташкил этилган «Трансчегаравий кибержиноятларни тергов қилишда минтақавий ҳамкорликни мустаҳкамлаш» мавзусидаги минтақавий семинарда иштирок этди.

Семинар трансчегаравий кибержиноятларни тергов қилишда юзага келаётган муаммоларни аниқлаш, уларни ҳал этиш йўлларини муҳокама қилиш ва минтақа давлатлари ҳамкорлигини мустаҳкамлашга қаратилган амалий тавсиялар ишлаб чиқиш мақсадида ўтказилди.

Унда Ўзбекистон, Қозоғистон, Қирғизистон, Тожикистон ва Туркманистоннинг соҳавий ваколатли органлари мутахассислари қатнашди. Амалий машғулотларда кибержиноятларни тергов қилиш усуллари, электрон далилларни тўплаш ва улардан фойдаланиш масалалари кўриб чиқилди. Шунингдек, Эстония ва Қозоғистон тажрибаси ҳамда Марказий Осиё давлатларининг кибертаҳдидларга қарши курашишдаги ҳамкорлигини ривожлантириш истиқболлари муҳокама қилинди.