Ўзбекистон Республикаси Ҳуқуқни муҳофаза қилиш академияси Иқтисодий жиноятларга қарши курашиш департаменти ва Марказий банк билан ҳамкорликда Asakabank, AVO bank, Kapitalbank ва Tenge Bankнинг ички назоратга масъул ходимлари учун икки кунлик малака ошириш курсларини ўтказди. Курслар жиноий даромадларни легаллаштириш ва терроризмни молиялаштиришга қарши курашиш ҳамда коррупцияга қарши тизим самарадорлигини ошириш масалаларига бағишланди.

Академия профессор-ўқитувчилари, Марказий банк ва Департамент мутахассислари ФАТФ халқаро стандартлари, молиявий хавф-хатарларни баҳолаш, мижозларни лозим даражада текшириш ва шубҳали операцияларни аниқлаш бўйича машғулотлар ўтказди. Ички назорат ва коррупцияга қарши комплаенс тизимларини такомиллаштириш масалалари ҳам кўриб чиқилди.

БМТнинг Наркотиклар ва жиноятчилик бўйича бошқармаси (UNODC)нинг коррупцияга қарши курашиш бўйича эксперти БМТнинг Коррупцияга қарши конвенцияси асосида комплаенсни ташкил этишга бағишланган амалий машғулот ўтказди. Курс иштирокчилари банк амалиётидаги долзарб муаммолар, молиявий ҳуқуқбузарликларнинг олдини олиш, коррупциявий хавф-хатарларни камайтириш ва халқаро тажрибани миллий амалиётга татбиқ этиш масалаларини муҳокама қилди.