Ўзбекистон Республикаси Ҳуқуқни муҳофаза қилиш академияси Тошкент шаҳар «Шароит плюс» (ННТ) ногиронлар жамоат бирлашмаси билан ҳамкорликда ногиронлиги бўлган шахсларнинг ҳуқуқларини ҳимоя қилиш ва инклюзив муҳитни шакллантириш масалаларига бағишланган давра суҳбати ўтказди. Учрашув БМТнинг Ногиронлар ҳуқуқлари тўғрисидаги конвенцияси қабул қилинганининг 20 йиллиги арафасида ташкил этилди.

Давра суҳбатида «Прокурорлик фаолияти» йўналиши талабалари иштирок этди. Мулоқот марказида ногиронлик тушунчаси ва Конвенцияда белгиланган ёндашув бўлди. Унга кўра, ҳуқуқларни тан олиш билан бирга, инсоннинг улардан фойдаланишига тўсқинлик қилаётган омилларни бартараф этиш ҳам тенгликни таъминлашнинг муҳим шарти ҳисобланади.

Иштирокчилар камситишнинг олдини олиш, таълим олиш ва меҳнат қилишда тенг имкониятларни яратиш, ногиронлиги бўлган шахсларнинг жамият ҳаётида иштирок этиши масалаларини кўриб чиқдилар. Давлат органлари ва жамоат ташкилотларининг вазифалари, шунингдек, ҳуқуқ ва эркинликларни ҳимоя қилишда ҳуқуқни муҳофаза қилувчи органларнинг ўрни алоҳида муҳокама қилинди.

Мавзунинг долзарблиги миллий қонунчиликдаги ўзгаришларда ҳам акс этган. 2024 йилда «Ногиронлиги бўлган шахсларнинг ҳуқуқлари тўғрисида»ги Қонунга одил судловдан тенг фойдаланиш ва ногиронлиги бўлган шахсларнинг суд жараёнининг барча босқичларида, шунингдек, суриштирув ҳамда дастлабки тергов босқичларида иштирокини таъминлашга қаратилган нормалар киритилди. Ушбу нормалар ҳуқуқни муҳофаза қилувчи органлар фаолиятига аниқ талаб қўяди: ногиронлиги бўлган шахснинг процессуал ҳаракатларда бошқа шахслар билан тенг иштирок этиши таъминланиши лозим.

Очиқ мулоқотда талабалар мутахассисларга саволлар бериб, фикр алмашдилар. Тадбир бўлажак ҳуқуқни муҳофаза қилувчи органлар ходимларида инсон ҳуқуқларига ҳурмат, ижтимоий масъулият ва инклюзив тафаккурни шакллантиришга хизмат қилади.