Стипендия дастурларининг миллий рақобатбардошликка таъсири, иқтидорли номзодларни саралаш ва таълим имкониятларидан тенг фойдаланишни таъминлаш Самарқандда бўлиб ўтган Global Talent Forum муҳокамасининг асосий мавзулари бўлди.
Ўзбекистон Республикаси Ҳуқуқни муҳофаза қилиш академияси бошлиғининг халқаро ҳамкорлик ва ёшлар билан ишлаш бўйича ўринбосари Уйғун Учқунович Нигмаджанов «Истеъдодларга инвестиция: стипендиялар миллий рақобатбардошлик катализатори сифатида» мавзусидаги панель сессиясига модераторлик қилди. Унда Германия, Польша, АҚШ, Япония ва Туркия ташкилотлари вакиллари қатнашди.
Сессияда стипендия дастурларини такомиллаштириш, истиқболли номзодларни аниқлаш, таълим олиш имкониятларида тенгликни таъминлаш, дастурларни барқарор молиялаштириш ва инсон капиталига йўналтирилган инвестицияларнинг узоқ муддатли натижаларини баҳолаш масалалари кўриб чиқилди.
29–30 октябрь кунлари ўтказилган форум ўзгараётган дунёда инсон капиталини ривожлантириш мавзусига бағишланди. У «Эл-юрт умиди» жамғармаси томонидан ташкил этилди.
