Ўзбекистон Республикаси Ҳуқуқни муҳофаза қилиш академияси талабалар, тингловчилар, профессор-ўқитувчилар ва ходимларни Zero Waste тамойиллари атрофида бирлаштириб, масъулиятли истеъмол ва ресурсларга эҳтиёткор муносабат амалиётини ривожлантирмоқда.

Академияда ҳар душанба куни Meatless Monday акцияси ўтказилади. Бу барқарор овқатланиш одатларини шакллантириш ва атроф-муҳитга тушадиган юкни камайтиришга қаратилган халқаро ташаббусдир. Навбатдаги акцияда 972 нафар киши ихтиёрий иштирок этди: 722 нафар талаба, 117 нафар тингловчи ва 133 нафар ўқитувчи ҳамда ходим.

Бу амалиётни Академияда доимий амал қилувчи Bring Your Own Cup ташаббуси тўлдиради. Унда иштирокчилар бир марталик пластикдан фойдаланишни камайтириш мақсадида ўзларининг кўп марта ишлатиладиган идишларидан фойдаланадилар. Акция куни 500 нафардан зиёд иштирокчи ўзининг кўп марта ишлатиладиган идишларидан фойдаланди.

Тақдим этилган ҳисоб-китобларга кўра, икки ташаббуснинг бир кунлик умумий натижаси қуйидагича баҳоланган:

• 21,1 кВт·соат электр энергияси тежалиши;
• 200 литр ичимлик ва 25 литр техник сув тежалиши;
• 160 литр оқова сув ҳосил бўлишининг олди олиниши;
• 2,5 килограмм пластик чиқинди ҳосил бўлишининг олди олиниши ва пластик қадоқлаш материаллари сарфининг 0,4 килограммга камайиши;
• CO₂ чиқиндиларининг ҳисоб-китоб бўйича 76,25 килограммга қисқариши.

Жамоа иштирокидаги ушбу ташаббуслар сув ва энергияни тежаш, пластик чиқиндиларни камайтириш ҳамда углерод изини қисқартиришга хизмат қилади. Meatless Monday ва Bring Your Own Cup ташаббуслари Zero Waste тамойилларини кундалик амалиётга татбиқ этиб, БМТнинг 6, 7, 12 ва 13-Барқарор ривожланиш мақсадларига ҳисса қўшади.