Рақамли трансформация, кибертаҳдидлар ва трансчегаравий жиноятчилик ҳуқуқни муҳофаза қилувчи органлар учун мутахассислар тайёрлашга қўйилаётган талабларни оширмоқда. Бу чақириқларга жавоб беришда таълим ташкилотларининг ўқув, илмий ва амалий салоҳиятини бирлаштирувчи ҳамкорлик муҳим аҳамият касб этади.

Ўзбекистон Республикаси ҳуқуқни муҳофаза қилувчи органлар олий таълим ташкилотлари Консорциумини ташкил этиш тўғрисидаги меморандум 2026 йил июнь ойида имзоланган. Консорциум таркибига Ўзбекистон Республикаси Ҳуқуқни муҳофаза қилиш академияси, Ички ишлар вазирлиги Академияси, Жамоат хавфсизлиги университети, Божхона институти ва Фавқулодда вазиятлар вазирлиги Академияси кирган. Консорциумнинг илк Мувофиқлаштирувчи кенгашига раислик Ҳуқуқни муҳофаза қилиш академиясига юклатилган.

Ҳамкорлик доирасида кўплаб қўшма ва очиқ машғулотлар ўтказилди, ўқув нашрлари тайёрланди, ўқув материаллари экспертизадан ўтказилди. Юридик фанлар бўйича ўнлаб ўқув дастури ишлаб чиқилиб, ички ва ташқи тақриздан ўтказилди.

2026 йил 10 ноябрь куни Ҳуқуқни муҳофаза қилиш академиясида Ўзбекистон Республикаси ҳуқуқни муҳофаза қилувчи органлар олий таълим ташкилотлари Консорциумининг мувофиқлаштирувчи Кенгаш йиғилиши бўлиб ўтди.

Мувофиқлаштирувчи кенгаш йиғилишида масъул идоралар ва халқаро ташкилотлар вакиллари иштирокида Консорциум фаолиятини келгусида самарали амалга ошириш масалалари кўриб чиқилди. Йиғилиш кун тартибига Консорциум Регламентини тасдиқлаш, Кенгаш, Котибият ва Ижро аппаратини шакллантириш ҳамда 2027–2029 йилларга мўлжалланган фаолият режасини тасдиқлаш масалалари киритилди. Режа ҳамкорликнинг саккизта йўналишини қамраб олади.

Умумий қоидаларнинг белгиланиши, масъул тузилмаларнинг шакллантирилиши ва уч йиллик режанинг тасдиқланиши идоралараро ҳамкорликни тизимли йўлга қўйиш ҳамда қўшма таълим ва илмий лойиҳаларни изчил давом эттириш учун асос яратади.