Ўзбекистон Республикаси Ҳуқуқни муҳофаза қилиш академиясида Абдуллаева Дилфуза Саидазимовнанинг «Ўзбекистон меҳнат қонунчилигини Халқаро меҳнат ташкилотининг фундаментал конвенциялари асосида такомиллаштириш» мавзусидаги диссертация иши ҳимояси бўлиб ўтди. Иш 12.00.05 – «Меҳнат ҳуқуқи. Ижтимоий таъминот ҳуқуқи» ихтисослиги бўйича юридик фанлар доктори (DSc) илмий даражасини олиш учун тақдим этилди.

Тадқиқот миллий меҳнат қонунчилигини Халқаро меҳнат ташкилотининг асосий конвенцияларига мувофиқлаштириш ва меҳнат муносабатларининг янги шаклларини ҳуқуқий тартибга солишга қаратилган. Ишда тўлиқсиз иш вақтида меҳнат қилувчилар учун кафолатларни белгилаш, тенг қийматли меҳнат учун тенг ҳақ тўлаш ва мослашувчан иш вақтини тартибга солиш бўйича таклифлар асослаб берилган.

Таклифларнинг алоҳида қисми рақамли меҳнат муносабатларини қамраб олади: вояга етмаганларнинг платформавий бандлигини тартибга солиш, масофавий ишловчиларни ҳимоя қилиш, алгоритмик камситиш ва психосоциал касбий хатарларнинг олдини олиш. Шунингдек, меҳнат назоратини такомиллаштириш ва ХМТ конвенциялари ижросини мунтазам мониторинг қилиш механизмларини жорий этиш таклиф қилинган.

Ҳимоя натижаларига кўра, Абдуллаева Дилфуза Саидазимовнанинг диссертация иши DSc.24/2025.27.12.Yu.01.01 рақамли Илмий кенгаш асосида тузилган бир марталик Илмий кенгаш томонидан 12.00.05 – «Меҳнат ҳуқуқи. Ижтимоий таъминот ҳуқуқи» ихтисослиги бўйича юридик фанлар доктори (DSc) илмий даражасини бериш учун тавсия этилди.