Ҳуқуқни муҳофаза қилиш академияси раҳбарияти Ўзбекистон Республикаси Конституциявий судининг 2026 йил 12 ноябрь куни бўлиб ўтган очиқ мажлисида иштирок этди.

Мажлисда Ўзбекистон Республикасининг Маъмурий жавобгарлик тўғрисидаги кодекси 324-39-моддаси олтинчи қисмининг Конституциянинг 28, 54 ва 55-моддаларига мувофиқлиги масаласи кўриб чиқилди. Мурожаатчилар Олий суднинг тафтиш тартибида кўрилган маъмурий иш бўйича қабул қилинган қарор устидан шикоят қилиш имконияти йўқлигини инсон ҳуқуқларини суд орқали ҳимоя қилиш кафолатлари ва айбсизлик презумпциясига зид деб ҳисоблаган.

Ўзбекистон Республикаси Ҳуқуқни муҳофаза қилиш академияси бошлиғининг биринчи ўринбосари Е.В.Коленко муҳокама қилинаётган масала юзасидан сўзга чиқиб, Академия позициясини баён қилди.

Суд мажлисида бошқа давлат идоралари ва таълим муассасалари вакиллари ҳамда Конституциявий суд ҳузуридаги Илмий-маслаҳат кенгаши аъзолари ҳам ўз фикрларини билдирди.