Ўзбекистон Республикаси Ҳуқуқни муҳофаза қилиш академияси ҳузуридаги DSc.24/2026.31.01.Yu.01.02 рақамли илмий даражалар берувчи Илмий кенгашда Мусаев Гайрат Фархадовичнинг 12.00.09 – «Жиноят процесси. Криминалистика, тезкор-қидирув ҳуқуқи ва суд экспертизаси» ихтисослиги бўйича диссертацияси ҳимоя қилинди. Тадқиқот Интернет тармоғининг яширин сегменти (Darknet)дан фойдаланиб содир этилган жиноятларни тергов қилиш методикасини такомиллаштиришга бағишланган.

Тадқиқотда рақамли криминалистика соҳасидаги илмий-методик асосларни ривожлантириш, рақамли далилларнинг ягона идоралараро реестрини ташкил этиш ва рақамли далилларнинг мустақил мақомини жиноят-процессуал қонунчилигида мустаҳкамлаш зарурати асосланган. Шунингдек, электрон маълумотларни олиб қўйиш ва кўздан кечиришда мутахассис иштирокини таъминлаш таклиф этилган.

Тадқиқотнинг амалий натижалари рақамли далиллар бўйича суд экспертизасини ўтказиш ва уларнинг ягона реестрини юритишга оид ҳужжатлар лойиҳалари, катта ҳажмдаги маълумотларни экспертиза тадқиқидан ўтказиш методикаси ҳамда криптоактивлар айланмаси соҳасидаги жиноятларни тергов қилиш бўйича ўқув-услубий қўлланмани қамраб олади. Киберхавфсизликни ҳуқуқий таъминлаш бўйича магистратура ўқув модули ишлаб чиқилиб, таълим жараёнига жорий этилган.

Ҳимоя натижаларига кўра, Мусаев Гайрат Фархадовичнинг диссертация иши юридик фанлар бўйича фалсафа доктори (PhD) илмий даражасини бериш учун Илмий кенгаш томонидан тавсия этилди.