Академик алмашинув, қисқа муддатли стажировкалар ва қўшма таълим модулларини ишлаб чиқиш Ўзбекистон Республикаси Ҳуқуқни муҳофаза қилиш академияси ҳамда Франция Ички ишлар вазирлиги ҳузуридаги Олий тадқиқотлар институти (IHEMI) вакиллари иштирокидаги музокараларнинг амалий йўналишлари бўлди.

Учрашувда делегация Академиянинг асосий фаолият йўналишлари, таълим дастурлари ва илмий-тадқиқот салоҳияти, шунингдек, Ўзбекистонда амалга оширилаётган суд-ҳуқуқ ислоҳотлари билан танишди. Криминалистик полигонлар, киберлабораториялар ва ситуацион марказлар фаолияти мисолида Академиянинг амалий имкониятлари намойиш этилди.

Музокараларда ҳуқуқни муҳофаза қилувчи органлар учун юқори малакали кадрлар тайёрлаш, касбий таълим ва илмий тадқиқотларни ривожлантириш масалаларига алоҳида эътибор қаратилди. Томонлар шу йўналишларда қўшма илмий-амалий лойиҳалар ва ташаббусларни амалга ошириш имкониятларини кўриб чиқди.

Учрашув якунида томонлар ҳамкорликнинг устувор йўналишлари бўйича қўшма лойиҳаларни ишлаб чиқиш ва амалий алоқаларни мустаҳкамлашга тайёр эканликларини билдирди.