Ўзбекистон Республикаси Ҳуқуқни муҳофаза қилиш академиясида туман (шаҳар) прокурорлари ва уларга тенглаштирилган прокурорларнинг ёрдамчилари, шунингдек вилоят прокуратуралари аппарат ходимлари учун ташкил этилган малака ошириш курси якунланди.

Машғулотларни Бош прокуратуранинг тегишли таркибий бўлинмаларида фаолият юритувчи амалиётчи прокурорлар ва Академия профессор-ўқитувчилари олиб бордилар.

Дарсларда судларда далилларни тўплаш ва баҳолаш, давлатга етказилган зарар миқдорини асослаш, прокурорнинг процессуал ваколатларидан самарали фойдаланиш, даъво талабларини асослаш ҳамда суд муҳокамасида ўз позициясини далилларга таяниб баён этиш масалалари кўриб чиқилди. Шунингдек, зарарни ундириш ҳақидаги суд ҳужжатлари ижроси устидан прокурор назоратини ташкил этиш ва юқори суд инстанцияларида суд ҳужжатларига ҳуқуқий баҳо беришнинг назарий ҳамда амалий жиҳатлари ўрганилди.

Суд жараёнини имитация қилиш машғулотларида тингловчилар далилларни тақдим этиш ва текшириш, процессуал позицияни асослаш ҳамда суд музокараларида нутқ сўзлаш бўйича амалий кўникмаларини мустаҳкамладилар.

Курс якунида комиссия тингловчиларнинг ўзлаштириш даражаси, билим ва кўникмалари, шунингдек бажарган лаборатория ишларини баҳолади.