Академия талабалари халқаро тоифадаги спорт усталари билан учрашди
ProAcademy
(71) 202-04-96
info@proacademy.uz
Заиф кўрувчилар учун

Янгиликлар

“Et docere et discere servitute legis”

Академия талабалари халқаро тоифадаги спорт усталари билан учрашди

Ўзбекистон Республикаси Ҳуқуқни муҳофаза қилиш академиясида «Ғалаба сари йўл – матонат, интизом ва фидойилик» шиори остида халқаро тоифадаги спорт усталари билан учрашув бўлиб ўтди. Тадбир ёшлар ўртасида соғлом турмуш тарзини тарғиб қилиш, уларнинг спортга бўлган қизиқишини ошириш, шунингдек, ватанпарварлик ва юксак иродавий фазилатларни шакллантиришга қаратилди.

Учрашувда бокс бўйича қатор турнирлар совриндори, халқаро тоифадаги спорт устаси Нодирбек Мирзаахмедов ҳамда дзюдо бўйича Ўзбекистон миллий терма жамоаси аъзоси, халқаро тоифадаги спорт устаси Бекмурод Олтибоев иштирок этди.

Мулоқот давомида спортчилар ўзларининг спорт фаолияти, эришган натижалари ва мусобақаларда орттирган тажрибалари ҳақида сўзлаб бердилар. Шунингдек, юқори натижаларга эришиш йўлида дуч келган қийинчиликлар ва уларни енгиб ўтишда қатъият, интизом ҳамда мунтазам машғулотларнинг аҳамияти ҳақида фикр юритдилар.

Очиқ мулоқот давомида талабалар ўзларини қизиқтирган саволларга жавоб олдилар. Спортчилар шахсий тажрибалари билан ўртоқлашиб, спортдаги ютуқлар машаққатли меҳнат, сабр-тоқат ва мақсад сари изчил интилиш натижаси эканини таъкидладилар.

Учрашувда спортнинг нафақат жисмоний камолот, балки шахсий интизомни мустаҳкамлаш, қийинчиликларни енгиб ўтиш ва масъулият ҳиссини шакллантиришдаги аҳамиятига ҳам эътибор қаратилди.

Спортчиларнинг ҳаётий тажрибаси ва спортдаги ютуқларга эришиш йўли талабалар учун ибрат бўлиб, уларда қатъият, интизом ва олдига қўйилган мақсадларга эришишга интилиш каби фазилатларни мустаҳкамлашга хизмат қилади.

Telegram Facebook