Ўзбекистон Республикаси Ҳуқуқни муҳофаза қилиш академиясида Қозоғистон Республикаси Бош прокуратураси ҳузуридаги Ҳуқуқни муҳофаза қилиш органлари академияси вакиллари – биринчи проректор Сауле Мамирбековна Сапаралиева ҳамда Кибержиноятчиликка қарши курашиш ва рақамли технологиялар институти директори ўринбосари Аскар Абужанович Калиев иштирокида икки томонлама учрашув бўлиб ўтди.
Учрашувда академиялар ўртасидаги ҳамкорликни янада ривожлантириш, илмий ва таълим соҳаларидаги алоқаларни мустаҳкамлаш, ҳуқуқни муҳофаза қилувчи органлар учун кадрлар тайёрлаш ва уларнинг малакасини ошириш борасида тажриба алмашиш, шунингдек, қўшма таълим ва илмий-тадқиқот ташаббусларини амалга ошириш истиқболлари муҳокама қилинди.
Кибержиноятчиликка қарши курашиш, рақамли криминалистика, сунъий интеллект ва замонавий рақамли технологияларни таълим жараёни ҳамда ҳуқуқни муҳофаза қилиш фаолиятига жорий этиш соҳаларидаги ҳамкорлик имкониятларига алоҳида эътибор қаратилди.
Шунингдек, иштирокчилар ҳамкорликнинг келгуси йўналишлари, жумладан, тегишли таркибий бўлинмалар ўртасидаги ҳамкорликни ривожлантириш, қўшма илмий-амалий тадбирлар ўтказиш, эксперт билим ва тажрибасини алмашиш масалалари юзасидан фикр алмашдилар.
Ташриф якунида икки академия вакиллари Ҳуқуқни муҳофаза қилиш академияси ҳудудида кўкаламзорлаштириш тадбирлари доирасида биргаликда дарахт экдилар.
Учрашув якунида томонлар академиялараро ҳамкорликни янада мустаҳкамлаш ва аниқ амалий ташаббусларни амалга оширишдан манфаатдор эканликларини билдирдилар.