Жиноятчиликка қарши курашишда инновацион ғоялар рақамли технологиялар орқали татбиқ этилмоқда

Корея халқаро ҳамкорлик агентлиги (KOICA) томонидан амалга оширилаётган «МДҲ давлатлари учун криминалистика соҳасида малака ошириш» дастури доирасида жиноят ишларни тергов қилиш жараёнига инновацион технологияларни жорий этилиши бўйича бир қатор тадбирлар ташкил этилди.

Хусусан, 2019 йил 21 февраль куни Бош прокуратура Академиясида «Рақамли далилларни тўплашда самарадорликни ошириш мақсадида рақамли тергов тизимини тадбиқ қилиш» мавзусида семинар ўтказилди.

Тадбирда Бош прокуратура, Далат божхона қўмитаси, ИИВ ҳузуридаги тергов департаменти, Олий суд, Бош прокуратура ҳузуридаги Иқтисодий жиноятларга қарши курашиш департаменти, Х.Сулайманова номидаги Республика суд экспертизаси маркази, ИИВ Эксперт-криминалистика маркази, ИИВ Академияси, ДХХ институти, Тошкент давлат юридик университети вакиллари ҳамда Бош прокуратура Академияси профессор-ўқитувчилари ва тингловчилар қатнашишди.

Тадбирда Корея Республикаси Олий прокуратураси Эксперт-криминалистика Департаменти бошлиғи Чо Нам Кван бошчилигидаги рақамли тергов тадқиқот институти мутахассислари ва экспертларидан иборат корея делегацияси иштирок этди.

Семинар Ўзбекистон Республикаси Бош прокурори Биринчи ўринбосари Э.Таджиев ва Корея Республикасининг Ўзбекистон Республикасидаги Фавқулодда ва мухтор элчиси Квон Ёнг У нинг кириш сўзи билан бошланди.

Семинар тергов органлари фаолиятига рақамли криминалистика, рақамли ва мобил тергов тизимини тадбиқ қилиш масалалари ва Корея Республикасининг соҳадаги тажрибасини ўрганишга қаратилган.

Корея делегацияси жиноятларни тергов қилиш давомида қўлланиладиган рақамли технология имкониятларини намойиш қилиб, жиноятларни фош этишга ёрдам берувчи рақамли исботларни олиш ва улардан фойдаланиш жараёни билан таништириб ўтди.

Бундан ташқари, 22 февраль куни жиноятларни тергов қилиш давомида рақамли манбадан маълумотларни олиш, йўқ қилинган далилларни тиклаш ва текширишга ёрдам берувчи илғор технологияларни қўллаш тартибини ўргатувчи семинар-тренинги ўтказилди.

Семинарда Тошкент шаҳар прокуратураси органлари терговчилари, Иқтисодий жиноятларга қарши курашиш Департаментининг Тошкент шаҳар бошқармаси суриштирувчилари, Чилонзор тумани ИИО ФМБнинг терговчи ва суриштирувчилари иштирок этишди.

Семинар давомида корея делегацияси Чилонзор туманида жамоат хавфсизлигини таъминлаш ва ҳуқуқбузарликлар профилактикасида амалга оширилаётган ишлар, шу жумладан АКТдан кенг фойдаланилган ҳолда олиб борилаетган тадбирлар, шунингдек Бош прокуратура Академиясининг Жиноятларни содир этилиши сабабларини тизимли таҳлил қилиш ва ўрганиш маркази фаолияти билан таништирилди.

Ўтказилган тадбирлар натижаларига кўра, жиноятчиликка қарши курашиш ва ҳуқуқбузарликлар профилактикаси фаолиятини ташкил қилишда илғор технологияларни тадбиқ қилиниши бўйича бир қатор таклифлар ишлаб чиқилди.