«Ўзбекистонда жавобгарликдан озод қилиш ва жавобгарликка тортилишини тиклаш тизимини киритиш» лойиҳаси

Жорий йилнинг 4-5 март кунлари Бош прокуратура Академияси «UNICEF» болалар фонди билан ҳамкорликда вояга етмаганлар учун одил судлови масалалари бўйича халқаро эксперт Ингрид ван Вельзенис иштирокида «Тошкент шаҳар Чилонзор тумани мисолида Ўзбекистонда жавобгарликдан озод қилиш ва жавобгарликка тортилишини тиклаш тизимини киритиш» лойиҳаси доирасида бир қатор учрашувлар бўлиб ўтди.

Тадбирларда «UNICEF», Олий суд, Бош прокуратура, Бош прокуратура Академияси, ИИВ, Адвокатлар палатаси, «Оила» маркази, «Маҳалла» Жамғармаси, Ёшлар Иттифоқи вакиллари, шунингдек, жиноят ишлари бўйича Чилонзор тумани суди судьялари, туман прокуратураси, ички ишлар органлари, туман ҳокимиятининг раҳбарияти ва ходимлари иштирок этишди.

Учрашувларда иштирокчилар вояга етмаган ҳуқуқбузарларни расман суд муҳокамасига юбормасдан туриб жавобгарликдан озод қилиш, шунингдек жавобгарликка тортилишини тиклаш жараёнидаги муаммоларни жиноят процессининг бошқа иштирокчилари ҳамкорлигида ҳал қилишга оид масалалар муҳокама қилинди.

Эксперт иштирокчиларни ҳуқуқбузарликлар содир этган вояга етмаганларни маъмурий ёки жиноий жавобгарликка тортиш ўрнига, уларга нисбатан муқобил таъсир чораларини қўллаш орқали (пробация) суддан ташқари ҳал этилишини кўзда тутувчи лойиҳа билан таништирди.

Вояга етмаганларни жавобгарликдан озод қилиш ҳамда жавобгарликка тортилишини тиклаш тизимини татбиқ қилиниши бўйича туман ИИБ ФМБ профилактика инспекторлари, ижтимоий соҳа вакиллари ва бошқа масъул шахслар учун жорий йилнинг 6-18 март кунлари Чилонзор туманидаги «Ground Zero Coworking Center» мажмуасида эксперт ва мутахассислар томонидан тренинглар ўтказилиши режалаштирилган.