Бош прокуратура Академиясида ўзбек тили кунини нишонлаш

Ўзбек тили – кўп миллатли Ўзбекистон халқининг мустақиллиги, миллий жипслиги, маданий меъроси ва ўзини англашининг рамзидир.

Мустақил Ўзбекистон тарихида биринчи марта Ўзбекистон Республикасининг 2020 йил 10 апрелдаги “Ўзбек тили байрами кунини белгилаш тўғрисида”ги Қонуни билан 21 октябрь ўзбек тили куни сифатида белгиланди. Бош прокуратура Академиясида ушбу санага аталган тантанали тадбир ташкил этилди.

Тадбирда Академиянинг раҳбарияти ва профессор-ўқитувчилари, магистратура тингловчилари ҳамда таклиф этилган тилшунос олимлар иштирок этишди.

Тадбир Академия раҳбариятининг табрик сўзи билан очилиб, мустақиллик ва давлатчиликни мустаҳкамлашда, авлодларнинг маънавий ва маданий ривожланишда она тилининг ўрни ва аҳамиятини, унинг роли ҳамда мавқеини қонуний равишда мустаҳкамлаш чораларини кўриш муҳимлиги қайд этилди.

Таклиф этилганлар, хусусан Алишер Навоий номидаги Тошкент давлат ўзбек тили ва адабиёти университети проректори А.Ш.Собиров ва Ўзбекистон давлат жаҳон тиллари университети чет тилларини ўқитишнинг инновацион усулларини ривожлантириш республика илмий-амалий маркази илмий ходими М.Т.Ирискуловлар томонидан ўзбек тилининг бой маданий меъроси, буюк аждодлар ижоди ва жаҳон адабиёти ҳамда шеъриятининг тан олинган дурдоналари дунёнинг кўплаб тилларига таржима қилингани алоҳида таъкидланди.

Шу билан бирга, Ўзбекистон Республикаси Президентининг БМТ Бош Ассамблеясининг 75-сессиясида ва Ўзбекистон Республикаси Олий Мажлис Сенати раисининг БМТнинг глобал саммитида ўзбек тилида нутқ қилганликлари тарихий аҳамияти таъкидлаб ўтилди.

Магистратура тингловчилари томонидан ўзбек тилига аталган шеърлар ўқиб берилди.

Тадбир якунида “Юридик соҳада давлат тилининг ўрни ва аҳамияти” мавзусида эсселар танлови ғолибларига диплом ва эсдалик совғалари топширилди.