Қорақалпоғистон Республикаси ва Хоразм вилоятида жамоат хавфсизлигини таъминлаш фаолияти ўрганиб чиқилди

Бош прокуратура Академияси ходимлари томонидан Қорақалпоғистон Республикаси ва Хоразм вилоятида Ўзбекистон Республикаси Президентининг 2018 йил 24 декабрдаги «Жамоат хавфсизлигини таъминлаш самарадорлигини ошириш бўйича қўшимча чора-тадбирлар тўғрисида»ги ПҚ–4075-сонли Қарори ҳамда 2018 йил 31 октябрдаги «Жиноий-ҳуқуқий статистика тизимини тубдан такомиллаштириш ва жиноятларни тизимли таҳлил қилиш самарадорлигини ошириш чора-тадбирлари тўғрисида»ги ПФ–5566-сонли Фармонининг ижроси ҳамда ҳудудларда жамоат хавфсизлигини таъминлаш фаолияти амалий ёрдам кўрсатиш йўли билан ўрганиб чиқилди.

Бир неча кун мобайнида ҳудудий прокуратура органлари, профилактика инспекторлари ҳамда ички ишлар органларининг бошқа масъул ходимлари иштирокида ўтказилган учрашувлар жараёнида, ҳуқуқбузарликлар профилактикасига масъул идоралар томонидан таҳлиллар маҳаллалар кесимида ўтказилиб, соҳавий фаолиятни ташкиллаштиришнинг янгича тартибига ўтиш муҳимлиги таъкидланди.

Шунингдек, амалиётда профилактика инспекторларининг асосий вазифалари, функциялари ва масъулият доирасини аниқ белгилаб олиш, уларнинг вазифалари кўламига тегишли бўлмаган ишларни юклашга йўл қўймаслик, профилактик ишларни аҳоли, фуқароларнинг ўзини-ўзи бошқариш органлари ва фуқаролик жамиятининг бошқа институтлари билан яқин ҳамкорликда ташкиллаштиришга алоҳида эътибор қаратилди.

Бундан ташқари, ўтказилган тадбирларда туман (шаҳар) прокурорлари раҳбарлигида жамоатчилик асосида фаолият юритадиган, жиноятчилик содир этилиши сабабларини тизимли таҳлил қилувчи эксперт-таҳлил гуруҳларининг фаолиятини ташкиллаштириш тартиби тушинтирилди. Шу билан бирга, эксперт-таҳлил гуруҳларнинг тадбирлар дастурига жамоат хавфсизлигини таъминлаш самарадорлигини ошириш ҳамда жиноятчиликнинг барвақт олдини олиш бўйича манзилли таклифларни ишлаб чиқиш ва амалга оширилиши муҳимлиги кўрсатиб ўтилди.