Қайта тайёрлаш курсларида ўзлаштирилган билимлар амалиётда мустаҳкамланади

Бош прокуратура Академиясида прокуратура органларида лавозимларни эгаллаш учун номзодларни бирламчи ихтисослашув шаклида касбий қайта тайёрлаш курслари давом этмоқда.

Бугунги кунда ўқув дастурида белгиланган “Жиноятчиликка қарши курашиш ва ҳуқуқбузарликлар профилактикаси” мавзусидаги ўқув блокининг аудитория машғулотлари якунланди ва тингловчилар Тошкент шаҳрининг туманларидаги прокуратура органларида амалиёт ўтамоқда.

Мазкур ўқув блоки бўйича тингловчилар воқеа жойини кўздан кечириш, тергов ҳаракатини ўтказишнинг ўзига хос хусусиятлари, жиноят ишларини тергов қилишда психологик таҳлил имкониятларидан ҳамда криминалистик техника воситаларидан фойдаланиш, жиноят ишини қўзғатиш, дастлабки тергов, терговга қадар текширув ва суриштирувнинг процессуал тартиби, сўроқ қилиш тактикаси, криминалистик тактика ва жиноятларни тергов қилишдаги аҳамияти, экспертиза турлари ва уларни ўтказиш тартиби, коррупциянинг олдини олиш ва уни профилактика қилишнинг айрим долзарб жиҳатлари, экстремистик ва террорчи ташкилотларни фош этиш ҳамда улар фаолиятига барҳам бериш каби муҳим масалаларга оид назарий билим ва амалий кўникмаларни ўзлаштирдилар.

Прокуратура органларида ташкил этилаётган амалиёт тингловчиларнинг Академия ўқув аудиторияларида малакали профессор-ўқитувчилар томонидан тақдим этилган маълумотларни тўлиқ ўзлаштириш, олган билим ва кўникмаларини реал иш фаолиятида мустаҳкамлаш имконини беради.