Тезкор-қидирув фаолияти – жиноятчиликка қарши курашиш самарадорлиги омили

27 май куни Бош прокуратура Академиясининг Иқтисодий жиноятларга ва жиноий даромадларни легаллаштиришга қарши курашишни ташкил этиш кафедраси томонидан “Иқтисодий жиноятларга қарши курашишда тезкор-қидирув фаолияти имкониятларидан фойдаланиш масалалари” мавзусига бағишланган давра суҳбати ташкил этилди.

Давра суҳбати Академиянинг 2019 йилнинг 1-ярмига мўлжалланган иш режасига мувофиқ ташкил этилиб, унда Ўзбекистон Республикаси ИИВ Академияси Тезкор-қидирув фаолияти кафедраси, Божхона институти, Бош прокуратура Академияси профессор-ўқитувчилари ва Раҳбар кадрларни қайта тайёрлаш курслари тингловчилари, Бош прокуратура ҳузуридаги Мажбурий ижро бюроси ва Иқтисодий жиноятларга қарши курашиш департаментининг тезкор бўлинмалари ходимлари иштирок этишди.

Давра суҳбатида иқтисодий жиноятларга қарши курашишда тезкор-қидирув фаолияти имкониятларидан фойдаланишда юзага келаётган айрим муаммолар ва уларни ҳал қилиш, тезкор-қидирув фаолияти қонунчилигини янада такомиллаштириш, тезкор бўлинмалар ҳамда суриштирув ва тергов органлари ўзаро ҳамкорлигини янада такомиллаштириш, иқтисодий жиноятларга қарши курашиш бўйича прокуратура органлари тезкор бўлинма ходимларини қайта тайёрлаш ва малакасини оширишга мўлжалланган ўқув машғулотлари самарадорлигини ошириш борасида фикр алмашилди.