Илмий консорциум – янги формат ва янги имкониятлар

Қонунчиликни такомиллаштириш ва ягона ҳуқуқни қўллаш амалиётини шакллантириш бўйича илмий асосланган хулоса ва тавсиялар ишлаб чиқиш Академиянинг асосий вазифаларидан бири ҳисобланади.

Айни пайтда Академиянинг муҳим таркибий бўлинмаларидан бири ҳисобланган Ҳуқуқий муаммоларни илмий-амалий ва инновацион тадқиқ қилиш ҳамда илмий ходимларни тайёрлаш маркази томонидан ҳуқуқни муҳофаза қилиш фаолияти йўналиши бўйича олий малакали илмий кадрларни тайёрлаш, шунингдек илмий фаолиятни ташкиллаштириш ва мувофиқлаштириш ишлари олиб борилмоқда.

Маълумки, жорий йилнинг 16-17 май кунлари Бош прокуратура Академияси томонидан “Ҳуқуқни муҳофаза қилиш соҳасида илмий ва таълим салоҳиятини ошириш: замонавий тенденциялар ва истиқболлари” мавзусида халқаро конференция ташкил этилди.

Ўзбекистон Республикаси Бош прокуратураси Академиясига асос солинганлигининг бир йиллигига бағишланган мазкур тадбир доирасида суд ва ҳуқуқни муҳофаза қилиш фаолияти соҳасида идоралараро илмий тадқиқотларни ўтказиш ва уларни мувофиқлаштириш мақсадида Бош прокуратура Академияси, Тошкент давлат юридик университети, Судьялар олий кенгаши ҳузуридаги Судьялар олий мактаби, Ички ишлар вазирлиги Академияси, Миллий гвардия Ҳарбий-техник институти, Давлат хавфсизлик хизмати институти, Адлия вазирлиги қошидаги Юристлар малакасини ошириш маркази, Давлат божхона қўмитасининг Божхона институти, Давлат солиқ қўмитаси ҳузуридаги Малака ошириш маркази Қўшма қарор имзоладилар.

Мамлакатимиз юридик фани тарихида илк маротаба ушбу ҳужжат билан суд ва ҳуқуқни муҳофаза қилиш фаолияти соҳасида илмий тадқиқотларни ҳамкорликда самарали амалга ошириш ва уларнинг натижаларини ҳуқуқни қўллаш амалиётига кенг жорий қилиш, шунингдек ушбу йўналишдаги саъй-ҳаракатларни бирлаштиришга қаратилган Илмий-тадқиқот консорциум ташкил этилди.

Илмий-тадқиқот консорциумининг асосий вазифаси 12.00.07 – “Суд ҳокимияти. Прокурор назорати. Ҳуқуқни муҳофаза қилиш фаолиятини ташкил этиш. Адвокатура” ихтисослиги бўйича фундаментал ва амалий илмий тадқиқотлар ўтказиш, ҳуқуқни қўллаш амалиётининг долзарб муаммолари бўйича идоралараро илмий-тадқиқотларни ташкиллаштириш, уларни мувофиқлаштириш ва мониторингини олиб бориш ҳисобланади.

Ушбу Консорциумнинг ишчи органи сифатида Бош прокуратура Академиясининг маркази белгиланди.

Айни пайтда “Жойларда секторлар фаолиятини ташкиллаштиришнинг самарали механизмларини яратиш, аҳоли муаммоларини аниқлаш ва ҳал этиш, шунингдек сектор масъул шахслари масъулиятини оширишнинг ҳуқуқий механизмларини такомиллаштириш”, “Жисмоний ва юридик шахслар мурожаатларини кўриб чиқиш ва ҳал этиш, фуқаролар ва юридик шахслар вакилларини қабул қилишнинг ҳуқуқий асосларини такомиллаштириш масалалари”, “Хуфиёна иқтисодиёт турларини аниқлаш ва уларга қарши курашишнинг ҳуқуқий механизмларини ишлаб чиқиш” ва шу каби бошқа долзарб масалалар бўйича қўшма тадқиқотлар тўғрисида таклифлар тайёрланди.