Академия магистратураси тингловчиларининг ўқув-амалий ташрифи

Жорий йилнинг 15 февраль куни Бош прокуратура Академияси магистратураси тингловчиларининг Тошкент вилояти Янгийўл шаҳар прокурори раҳбарлигидаги ҳудудларни комплекс ижтимоий-иқтисодий ривожлантириш бўйича секторга ўқув ташрифи амалга оширилди.

Ташриф давомида тингловчилар сектор штаби фаолияти билан яқиндан танишдилар, фуқароларни сайёр қабул қилиш жараёнида бевосита иштирок этдилар ва шу орқали мурожаатларни қабул қилиш ҳамда фуқароларга ҳуқуқий тушунтиришлар бериш тартиби борасида кўникамаларини мустаҳкамладилар.

Шунингдек, Академия магистратураси тингловчилари шаҳар прокуратураси томонидан 2019 йилда амалга оширилган ишлар тўғрисида Халқ депутатлари Янгийўл шаҳар кенгаши олдида шаҳар прокурорининг ҳисобот тақдим этиш жараёнида қатнашдилар.

Бундан ташқари, тингловчилар шарбатлар ишлаб чиқаришга ихтисослашган “Mega plyus” МЧЖ фаолияти билан танишдилар ва прокуратура органлари томонидан ҳудуддаги тадбиркорлик субъектларининг ҳуқуқ ва қонуний манфаатларини ҳимоя қилиш ҳамда уларга амалий ёрдам кўрсатиш борасида амалга оширилаётган таъсирчан чора-тадбирлар тўғрисида батафсил маълумотга эга бўлдилар.

Академия томонидан тингловчиларнинг шунга ўхшаган ташрифлари тизимли  равишда амалга оширилиб, аудитория машғулотлари жараёнида ўзлаштирилган билимларни мустаҳкамлаш, назария ва амалиётнинг узвий боғлиқлигини таъминлаш, зарур касбий компетенцияларни шакллантиришга хизмат қилади.