Академия Кенгашининг навбатдаги мажлиси якуни ҳақида

2020 йил 19 февраль куни Бош прокуратура Академияси Кенгашининг навбатдаги мажлиси бўлиб ўтди.

Мажлисда Академия таркибий тармоқларининг жорий йил январь ойидаги фаолияти якуни кўриб чиқилди, шунингдек прокуратура органлари кадрларини тайёрлаш, қайта тайёрлаш ва уларнинг малакасини оширишнинг замонавий тизимини яратиш бўйича Бош прокуратура Ҳайъати йиғилишида белгиланган вазифаларни тўлақонли амалга оширишни таъминлаш бўйича бирламчи чоралар муҳокама қилинди.

Илм-фан, таълим ва амалиётнинг ўзаро алоқасини таъминлаш Академия фаолиятини ташкил этишнинг асоси ва прокуратура органлари ходимларининг касбий кўникмалари ва компетенцияларини такомиллаштиришнинг муҳим омили эканлиги таъкидланди.

Академия илмий салоҳиятини янада ошириш мақсадида “12.00.03-Фуқаролик ҳуқуқи. Тадбиркорлик ҳуқуқи. Оила ҳуқуқи. Халқаро хусусий ҳуқуқ” ихтисослиги бўйича олий таълимдан кейинги таълим институтини очиш борасида аниқ вазифалар белгиланди, “12.00.12. – Коррупция муаммолари” ихтисослиги бўйича малака имтиҳони саволлари тасдиқланди.

Академия профессор-ўқитувчилари томонидан тайёрланган “Фуқаролик суд ишларини юритишнинг ўзига хос хусусиятлари”, “Ўзбекистон Республикасида мулк ҳуқуқини амалга ошириш ва ҳимоя қилиш механизмлари”, “Фуқаролар қабулида мулоқот маданияти қоидаларига риоя этиш шартлари” мавзусидаги монография ва илмий-амалий қўлланмалар ҳам Кенгаш аъзолари томонидан кўриб чиқилди.

Шунингдек, кун тартибидаги бошқа масалалар бўйича тегишли қарорлар қабул қилинди.