Халқ таълими тизимидаги ислоҳотларга бағишланган учрашув ўтказилди

2020 йил 20 февраль куни Бош прокуратура Академиясида Халқ таълими вазирининг биринчи ўринбосари лавозимида ишлаган ва ҳозирда Тошкент давлат педагогика университети ректори А.Ю.Умаровнинг магистратура тингловчилари билан учрашуви бўлиб ўтди.

Алишер Умаров ўз маърузасида бугунги кунда халқ таълими тизимини тубдан ислоҳ қилиш ва муҳтарам Президентимиз томонидан илгари сурилган 5 та ташаббусни тўлақонли амалга оширишга қаратилган кенг кўламли ишлар ҳақида тингловчиларга маълумот берди.

Маърузада шунингдек, таълим соҳасида мавжуд устувор вазифалар билан бир қаторда, президент мактабларининг қурилиши, ўқувчиларни олий таълим муассасаларига ўқишга кириш учун тайёрлашда замонавий стандартларга мос келадиган янгича ёндашувнинг жорий этилганлиги, олимпиада ғолиблари ва уларнинг мураббийларини рағбатлантиришнинг янги тизими амалга киритилганлиги ва мактаб тизимида мажбурий меҳнатга барҳам берилганлиги каби ислоҳотлар доирасида сезиларли натижаларга эришилганлиги айтиб ўтилди.

Учрашув якунида тингловчилар ўзларини қизиқтирган саволларга жавоб олишди.

P.S. Маъруза ўқиш учун таклифнома юборилган вақтда Алишер Юсубжанович Умаров халқ таълими вазирининг биринчи ўринбосари лавозимини эгаллаган. Бош прокуратура Академияси жамоаси уни Тошкент давлат педагогика университети ректори лавозимига тайинланганлиги муносабати билан самимий табриклайди ва унга мазкур таълим муассасасининг янада ривожланиши йўлида муваффақиятли қарорлар қабул қилишда улкан зафарлар тилайди!