“Олий таълим – коррупциясиз соҳа” мавзусида халқаро илмий-амалий конференция бўлиб ўтмоқда

Айни вақтда Бош прокуратура Академияси томонидан Олий Мажлис Сенати, Олий ва ўрта махсус таълим вазирлиги, Ўзбекистон ёшлар иттифоқи билан ҳамкорликда Япония халқаро ҳамкорлик агентлиги (JICA), ЮНЕСКОнинг Ўзбекистондаги ваколатхонаси, БМТ НЖБ, шунингдек ЕХҲТнинг Ўзбекистондаги лойиҳалари координатори офиси кўмагида 2020 йил 27-28 февраль кунлари ўтказилиши мўлжалланган “Олий таълим – коррупциясиз соҳа” мавзусидаги халқаро илмий-амалий конференция бўлиб ўтмоқда.

Конференциядан кўзланган мақсад олий таълим соҳасида коррупцияга қарши курашишга қаратилган ҳуқуқий механизм ва амалий чора-тадбирлар қабул қилинишининг жорий ҳолатини муҳокама қилиш, ушбу соҳада халқаро тан олинган стандартлар ва илғор хорижий тажриба асосида академик ҳалоллик маданиятини ривожлантириш бўйича амалий тавсияларни ишлаб чиқишдан иборат.

Конференция доирасида коррупцияга қарши курашиш соҳасида халқаро ва миллий экспертлар, бир қатор олий таълим муассасалари раҳбарияти, Олий ва ўрта махсус таълим вазирлиги, Академия ходимлари ва бошқа мутахассислар маъруза билан иштирок этадилар.

Тадбирнинг биринчи куни тематик ялпи мажлислар доирасида таълим олиш имконияти ва ходимларни ишга қабул қилиш, академик ҳалоллик, олий таълим соҳасида коррупцияга қарши курашишда ахборот технологияларидан фойдаланиш каби масалалар атрофлича муҳокама қилинди.

Тадбирнинг иккинчи куни халқаро экспертлар иштирокида олий таълим тизимида коррупциявий ҳолатларини минималлаштиришга оид тренинг бўлиб ўтади.