Қонунийлик ва жиноятчилик аҳволини таҳлил этиш ҳамда тизимли камчилик ва муаммоларни бартараф этишга йўналтирилган ўқув курслари

Қонунийликни таъминлаш ва жиноятчиликка қарши кураш соҳасида ходимларнинг тизимли таҳлил, прогнозлаш ва режалаштириш кўникмаларини такомиллаштириш мақсадида, жорий йилнинг 12-17 июнь кунлари Академияда Тошкент шаҳри туманлари прокурорлари ва шаҳар прокуратураси таркибий тармоқлари бошлиқлари иштирокида “Қонунийлик ва жиноятчилик аҳволини таҳлил қилиш ҳамда тизимли камчилик ва муаммоларни бартараф этиш” мавзусида қисқа муддатли ўқув курси ўтказилди.

Ўқув машғулотларига Бош прокуратуранинг тегишли таркибий тармоқлари ходимлари, шунингдек, Ўзбекистон Республикаси Президенти ҳузуридаги Лойиҳа бошқаруви миллий агентлиги ҳузуридаги Республика бизнес ва бошқарув олий мактаби вакиллари эксперт сифатида жалб этилди.

Ўқув дастури тизимли ёндашув асослари, ижтимоий ва иқтисодий соҳаларда қонунийликни таҳлил қилиш методлари, вояга етмаганларга оид қонунлар ижроси соҳасида вазиятни ўрганишнинг ўзига хос хусусиятлари, прогнозлаш турлари ҳамда тизимли муаммоларни аниқлаш ва бартараф этиш бўйича ишларни режалаштиришнинг самарали усулларини қўллаш каби бир қатор долзарб мавзуларни ўз ичига олди.

Ўқув курси якунига кўра тингловчилар – Тошкент шаҳар туманлари прокурорлари ўзлари фаолият кўрсатаётган туманлардаги қонунийлик ҳолати ва жиноятчилик аҳволи таҳлили акс этган тақдимотларни намойиш қилиб, тизимли муаммо ва камчиликларни бартараф этиш борасидаги таклиф ва мулоҳазалари билан ўртоқлашдилар.

Курс иштирокчилари томонидан ўқув машғулотлари давомида эгалланган билим ва амалий кўникмалар уларнинг қонунийликни таъминлаш ва жиноятчилик профилактикасини таъминлаш борасидаги фаолияти самарадорлигини оширишда қўлланилиши таъкидланди.