Департамент ходимлари учун масофавий малака ошириш курслари

Бош прокуратура Академиясида Иқтисодий жиноятларга қарши курашиш департаментининг туман (шаҳар) бўлимлари бошлиқлари учун малака ошириш курслари ташкил этилди.

Коронавирус инфекцияси тарқалишининг олдини олишга қаратилган бир қатор чоралар жорий этилганлиги муносабати билан мазкур курслар Академиянинг «ProAcademy» электрон ахборот-таълим портали базасида масофавий таълим шаклида амалга оширилмоқда.

Мазкур курсларга Департаментнинг барча туман (шаҳар) бўлимлари бошлиқларини тўлиқ қамраб олинишини таъминлаш мақсадида тингловчилар тўртта мақсадли гуруҳларга бўлинди.

Ўқув курслари дастури жиноий схемалар ва коррупцион қилмишларни аниқлашда тизимли таҳлил, суриштирув ва тезкор-қидирув фаолиятини амалга ошириш, жиноий фаолиятдан олинган даромадларни легаллаштириш, бюджет маблағларини талон-тарож қилиш, солиқ ва валюта соҳасидаги жиноятларга қарши курашиш масалаларини қамраб олган.

Дастур тингловчиларнинг қайта алоқа механизмлари орқали аниқланган эҳтиёжларини инобатга олган ҳолда иқтисодий жиноятларга қарши курашишни ташкил этишнинг долзарб масалалари бўйича ишлаб чиқилган бўлиб, бу курснинг амалий аҳамиятини янада оширади.

Курсни ўтказишни лозим даражада ташкил этиш мақсадида тингловчиларга ишдан ажралмаган ҳолда курсни ўташ тартиби, амалий топшириқларни бажариш қоидалари таништирилиб, уларнинг Академия профессор-ўқитувчилари билан доимий алоқада бўлиш имкониятларини таъминлаш чоралари кўрилди.