“Жиноятчиликнинг олдини олиш ва жиноий судлов ишлари тизими” мавзусидаги халқаро ўқув дастурида иштирок этилди

Ўзбекистон Республикаси Бош прокуратураси Академияси вакили 2019 йилнинг 15 май – 21 июнь кунлари Япония халқаро ҳамкорлик агентлиги (JICA) кўмагида Токио шаҳрида ташкил этилган “Жиноятчиликнинг олдини олиш ва жиноий судлов ишлари тизими” мавзусидаги халқаро ўқув дастурида иштирок этди.

Ўқув дастурининг асосий мақсади – жиноятчиликнинг олдини олиш, уюшган жиноятчилик, шу жумладан одам савдоси ва мигрантлар контрабандаси жиноятларига қарши курашиш, одам савдоси жабрдийдаларининг ҳуқуқ ва манфаатларини ҳимоя қилиш ҳамда иштирокчи давлатлар ўртасида халқаро ҳамкорликни ривожлантиришга қаратилган.

Ўқув машғулотлари Бирлашган Миллатлар Ташкилотининг Жиноятчиликнинг олдини олиш ва профилактика қилиш бўйича Осиё ва Узоқ шарқ институтида (UNAFEI) ўтказилди.

Тадбирда Академия вакили “Одам савдоси: муаммолар ва уларнинг олдини олиш чора-тадбирлари” тўғрисида маъруза қилди.

Дастур доирасида Япония адлия вазирлиги, суд ва прокуратура органлари, денгизни қўриқлаш хизмати ва жазони ижро этиш муассасасига ташриф уюштирилиб, ушбу ташкилотлар фаолияти билан яқиндан танишилди.

Умуман олганда, жиноятчиликнинг олдини олиш ва жиноий судлов соҳасида Япония тажрибасини чуқурроқ тадқиқ этиш ва Ўзбекистон жиноий судлов ишлари тизимида татбиқ этиш самарали ҳисобланади.