Бош прокуратура Академияси магистратурасида масофавий таълим йўлга қўйилди

Бош прокуратура Академияси томонидан 2018 йилдан бошлаб тизимли асосда прокуратура органлари ходимларининг малакасини ошириш ва уларни қайта тайёрлашнинг барча йўналишлари бўйича электрон (масофавий) таълим жорий этилган.

Амалдаги масофавий таълим дастурининг имкониятларини кенгайтириш, шунингдек коронавируснинг тарқалиши ва у билан боғлиқ карантин чора-тадбирлари жорий этилганлигини инобатга олган ҳолда, Академия “Ўзбектелеком” АКнинг техник кўмаги ёрдамида магистратура тингловчиларини масофавий синхрон ўқитишни таъминлаш мақсадида TAS-IX тармоғида видеоконференцалоқа платформаси қўшимча равишда синов тартибида ишга туширилди.

Мазкур платформа Интернет тармоғида реал вақт режимида таълим жараёнини тўлақонли ташкил этиш учун зарур бўлган қатор имкониятларни ўзида мужассам этган.

Хусусан, Академия профессор-ўқитувчилари томонидан реал вақт режимида ўқув машғулотлар ўтказилиб, магистрлик диссертациялари доирасида тингловчилар томонидан илмий тадқиқотларни олиб бориш ҳолати муҳокама қилинмоқда.

Фурсатдан фойдаланиб, Бош прокуратура Академияси “Ўзбектелеком” АК раҳбариятига магистратурада ўқув жараёнини узлуксиз ўтказилишини таъминлаш мақсадида кўрсатган техник кўмаги учун миннатдорчилик билдиради.